Kryetarja e bashkisë së Los Angeles, Karen Bass, ka shpallur një shtetrrethim në disa pjesë të qendrës së qytetit pas trazirave të fundit.
Masa ka hyrë në fuqi nga ora 8 e mbrëmjes deri në orën 6 të mëngjesit sipas orës lokale dhe pritet të mbetet aktive për disa ditë.
Sipas autoriteteve, shtetrrethimi është një përpjekje për të rikthyer rendin dhe për të parandaluar përshkallëzimin e situatës në qytet.
“Ka grafite kudo në qendër të qytetit dhe janë shkaktuar dëme të konsiderueshme,” deklaroi Kryetarja e bashkisë, duke theksuar se qyteti ka përjetuar një valë dhune dhe vandalizmash në ditët e fundit.
Bass sqaroi gjithashtu se qarkullimi do të lejohet vetëm në raste të kufizuara, për banorët e zonave të prekura dhe për punonjësit që kanë nevojë të udhëtojnë për arsye pune. Autoritetet lokale kanë bërë të ditur se masa do të rishikohet me kalimin e kohës në varësi të zhvillimeve në terren.
Vendimi vjen në një kohë tensioni të lartë në qytet, i cili është bërë skenë protestash dhe përplasjeje mes demonstruesve dhe forcave të rendit, kryesisht për çështje që lidhen me emigracionin dhe politikat e administratës qendrore.
Presidenti amerikan Donald Trump ka sulmuar ashpër autoritetet lokale, duke akuzuar guvernatorin e Kalifornisë Gavin Newsom dhe kryetaren e bashkisë së Los Angeles, Karen Bass, për dështime në menaxhimin e situatës dhe në rindërtimin pas zjarreve shkatërrimtare.
“Po të mos kisha dërguar trupat në Los Angeles, ajo qytet sot do të ishte në flakë,” tha Trump, duke shtuar: “25 mijë shtëpi janë shkatërruar për faj të një guvernatori dhe një kryetare bashkie të paaftë.” Ai deklaroi se synon të “çlirojë” qytetin dhe ta bëjë sërish të sigurt, duke pretenduar se protestat janë të organizuara nga “rebelë të paguar” që valëvisin flamuj të huaj.
