Presidentja e Komisionit Evropian, Ursula von der Leyen, ka reaguar përmes një postimi në platformën X (pas sulmeve ajrore të SHBA-së ndaj centraleve bërthamore të Iranit, duke theksuar rëndësinë e diplomacisë dhe respektimit të të drejtës ndërkombëtare.
Në reagimin e saj, von der Leyen tha se “Irani nuk duhet ta ketë kurrë bombën bërthamore”, duke theksuar se stabiliteti rajonal dhe global duhet të jetë prioritet, sidomos në një moment ku tensionet në Lindjen e Mesme kanë arritur kulmin.
“Irani nuk duhet të ketë kurrë bombën bërthamore. Me tensionet në Lindjen e Mesme në një kulm të ri, stabiliteti duhet të jetë përparësi, ashtu si respekti për të drejtën ndërkombëtare është thelbësor.”
Presidentja e Komisionit bëri thirrje për një zgjidhje diplomatike të besueshme, duke vënë theksin te rëndësia e dialogut në vend të përshkallëzimit ushtarak:
“Tani është momenti që Irani të angazhohet në një zgjidhje diplomatike të besueshme. Tavolina e negociatave është i vetmi vend për t’i dhënë fund kësaj krize”, shkruan ajo.
Ky reagim vjen në mes të një krize ndërkombëtare të përshkallëzuar, pasi avionët amerikanë goditën tri objektiva kryesore bërthamore në Iran, përfshirë impiantin e njohur Fordo, të vendosur në thellësi nëntokësore. Bashkimi Evropian ka shprehur më herët shqetësimin për përparimin e Iranit në pasurimin e uraniumit dhe ka bërë thirrje për rifillimin e negociatave bërthamore, të ndërprera që prej muajsh.
