Një ngjarje e rrezikshme u regjistrua këtë të premte në aksin rrugor Lezhë–Shkodër, në vendin e quajtur “Gajush”, ku një 26-vjeçar refuzoi t’u bindet urdhrave të policisë dhe tentoi të largohej me shpejtësi, duke vënë në rrezik jetën e efektivëve.
Rreth orës 12:00, Njësia Operacionale për Sigurinë Rrugore dhe Autostradat, gjatë kontrollit të automjeteve në qarkullim, i bëri shenjë për ndalim një makine që po kryente manovra të rrezikshme në trafik. Drejtuesi i mjetit, shtetasi J. D., 26 vjeç, banues në Lezhë, rezultoi se po drejtonte mjetin me leje drejtimi të hequr për një shkelje të mëparshme.
Gjatë komunikimit për shoqërimin në Drejtorinë Vendore të Policisë, i riu refuzoi t’i bindet urdhrave dhe tentoi të largohej me shpejtësi, duke rrezikuar drejtpërdrejt jetën e një prej efektivëve. Në kushtet e rrezikut të çastit, punonjësi i policisë përdori armën e shërbimit dhe qëlloi në gomën e automjetit, duke bërë të mundur neutralizimin e drejtuesit të mjetit pa pasoja për jetën apo shëndetin e personave të përfshirë.
Gjatë kontrollit të mëpasshëm, në automjet u gjet edhe një armë e ftohtë që mbahej pa leje.
Në automjet ndodhej dhe një pasagjer tjetër, shtetasi E. S., 20 vjeç, gjithashtu banues në Lezhë. Të dy personat janë shoqëruar në Komisariatin e Policisë Lezhë, ndërsa ndaj J. D. janë ngritur akuzat për veprat penale:
-
“Drejtimi i mjeteve në mënyrë të parregullt” (neni 291),
-
“Kundërshtimi i punonjësit të policisë së rendit publik” (neni 236),
-
“Prodhimi, mbajtja, blerja apo shitja pa leje e armëve të ftohta” (neni 279).
Një grup i posaçëm hetimor nga Policia e Shtetit dhe Agjencia e Mbikëqyrjes Policore, nën drejtimin e Prokurorisë së Lezhës, po vijon hetimet për zbardhjen e plotë të ngjarjes dhe verifikimin e ligjshmërisë së përdorimit të armës së zjarrit nga punonjësi i policisë.
