Policia e Gjirokastrës ka intensifikuar kontrollet për ndotjen akustike në zonat turistike të qytetit, në kuadër të masave për sezonin veror.
Janë zhvilluar matje të nivelit të zhurmës në ambiente të hapura dhe të mbyllura, të cilat kanë rezultuar brenda kufijve të lejuar.
Gjithashtu, janë kryer kontrolle për respektimin e orarit të lejuar për muzikë. Policia fton qytetarët të raportojnë çdo shkelje që cenon qetësinë publike.
Njoftimi i policisë:
DVP Gjirokastër/Policia, kontrolle për nivelin e zhurmave në zonat turistike të Gjirokastrës.
Në vijim të masave sensibilizuese, janë organizuar takime informuese me administratorë/pronarë subjektesh, kryesisht në zonat turistike, aktivitetet e të cilëve gjenerojnë zhurma nga muzika.
Gjithashtu, ka nisur zbatimi i detyrave të parashikuara në planin e masave për garantimin e sigurisë publike gjatë sezonit turistik veror.
Strukturat e sigurisë publike të Drejtorisë Vendore të Policisë Gjirokastër, në bashkëpunim me ato të Komisariatit të Policisë Gjirokastër, gjatë ditëve të fundit, sipas hartëzimit të zonave me ndotje akustike, kanë organizuar grupe kontrolli në terren.
Në kuadër të këtyre kontrolleve, janë testuar me matës të zhurmës, disa ambiente dhe subjekte, të hapura dhe të mbyllura, në zona turistike, për verifikimin e respektimit të nivelit kufi të lejuar të zhurmës, të përcaktuar në ligjin nr. 9774, datë 12.07.2007 “Për administrimin e zhurmës në mjedis”, i ndryshuar.
Matjet e realizuara, sipas kushteve të përcaktuara në procedurën standarde për këtë qëllim, kanë rezultuar brenda kufijve të lejuar. Krahas matjes së nivelit të zhurmës, strukturat përgjegjëse kanë ushtruar kontrolle edhe për respektimin e orarit të lejuar për muzikën në ambiente të hapura, në zona apo qendra të banuara, i cili është nga ora 11:00 deri në orën 24:00.
Policia e Gjirokastrës mbetet e angazhuar dhe e vendosur për të garantuar një mjedis të qetë dhe të sigurtë për banorët dhe vizitorët.
🛑 Ftojmë qytetarët të denoncojnë çdo shkelje 📞, duke iu garantuar ndërhyrje të menjëhershme ligjore.
