Një vatër zjarri është raportuar dje rreth orës 14:00 në Parkun Natyror Bize-Martanesh. Për shkak të terrenit të thepisur dhe mungesës së valëve, informacioni ka qenë i kufizuar. Zjarri ka qenë i natyrës përshkuese dhe në vendngjarje kanë ndërhyrë punonjës të AdZM Dibër dhe zjarrfikës nga Bulqiza. Falë ndërhyrjes së tyre, mbrëmë është bërë i mundur izolimi i vatrës së zjarrit. Sot është konfirmuar se zjarri është shuar plotësisht, duke shkaktuar vetëm dëme në trungje të thara dhe shkurre.
Shërbimi zjarrfikës i Kuçovës ka ndërhyrë në një vatër zjarri në zonën e Dikatërit, afër sektorit nr. 4 të naftës. Në operacion morën pjesë 5 efektivë zjarrfikës. Zjarri është vënë nën kontroll dhe është shuar. Aktualisht, grupi në terren po kryen freskimin e vatrës për të shmangur riaktivizimin.
Një tjetër vatër zjarri është raportuar nga MZSH Vlorë në zonën e Kuzum Babasë, bashkia Vlorë. Për ndërhyrje është nisur një mjet zjarrfikës me 3 efektivë. Ndërhyrja vijon dhe jemi në komunikim të vazhdueshëm me autoritetet lokale për çdo zhvillim të mëtejshëm.
Strukturat e bashkisë Fier kanë raportuar një zjarr në fshatin Gjorgos. Në vendngjarje është nisur menjëherë një mjet zjarrfikës me efektivët përkatës. Situata po monitorohet dhe do të jemi në kontakt të vazhdueshëm për përditësime.
