Gjykata e Lartë e Londrës ka rrëzuar kërkesën ligjore të paraqitur nga disa prej organizatave më të njohura ndërkombëtare për të drejtat e njeriut, të cilat kërkonin pezullimin e furnizimeve ushtarake britanike për Izraelin, në kuadër të luftës në Gaza.
Në mesin e organizatave që mbështetën padinë ishin Amnesty International, Human Rights Watch, Oxfam dhe organizata palestineze Al-Haq.
Në thelb të kërkesës ishte ndalimi i eksportit të përbërësve britanikë që përdoren për avionët luftarakë amerikanë F-35, të cilët janë përdorur në sulmet ajrore të Izraelit në Rripin e Gazës.
Gjykatësit Stephen Males dhe Karen Steyn pranuan se armët britanike mund të jenë përdorur në shkelje të ligjit ndërkombëtar humanitar, por theksuan se vendimet mbi eksportet ushtarake janë në kompetencën e qeverisë, e cila është përgjegjëse para Parlamentit.
Organizata palestineze Al-Haq, e mbështetur nga rrjeti ndërkombëtar Global Action Legal Network (GLAN), akuzoi Izraelin për gjenocid ndaj civilëve palestinezë dhe kërkoi zbatimin e ligjit britanik mbi eksportet e armëve, që ndalon shitjen e tyre nëse përdoren në shkelje të të drejtave të njeriut apo në veprime lufte.
Qeveria britanike ka pezulluar një pjesë të vogël të licencave të eksportit të armëve drejt Izraelit muajt e fundit – rreth 10% e totalit – por ka refuzuar të ndalojë furnizimin për F-35. Sipas saj, një ndalim i tillë do të rrezikonte programin ndërkombëtar të F-35, i cili ka një rëndësi strategjike për NATO-n dhe stabilitetin global.
Nga ana tjetër, përfaqësuesit ligjorë të organizatave joqeveritare kanë dënuar vendimin, duke e cilësuar si një justifikim të bazuar në “kavile ligjore”, ndërkohë që avionët F-35 kanë hedhur tashmë tonelata bombash në Gaza.
