Sipërmarrësi i njohur amerikan Elon Musk ka njoftuar krijimin e një partie të re politike, të quajtur “Partia Amerikane”, pas një votimi të zhvilluar në rrjetin social X. Në një postim të tij, Musk deklaroi se, pas një fitoreje të dukshme, do të krijohet një parti që synon të ndryshojë kursin politik të vendit.
“Me një faktor 2 me 1, nëse doni një parti të re politike, do ta keni!” shkroi Musk në postimin e tij. Ai theksoi se Shtetet e Bashkuara po kalonin një periudhë të vështirë, ku “shpenzimet e tepërta dhe ryshfeti po çonin vendin drejt falimentimit”, duke shtuar se qytetarët e tij po jetonin nën një sistem njëpartiak, dhe jo një demokraci të vërtetë.
Musk vazhdoi të theksojë se, “Sot, Partia Amerikane është formuar për t’ju rikthyer lirinë tuaj.”
Në një votim që u zhvillua në platformën X, mbi 1.2 milion përdorues morën pjesë. Rezultatet treguan një mbështetje të fuqishme për krijimin e partisë, me 65.4% të votuesve që miratuan idenë për një parti të re politike në Shtetet e Bashkuara.
Ky njoftim ka shkaktuar reagime të shumta në mediat sociale, me disa duke e parë Musk si një udhëheqës të mundshëm të një lëvizjeje të re, ndërsa të tjerë ngrejnë dyshime mbi ndikimin e tij në politikën amerikane.
