Partia e Lirisë dënon me forcë ndërhyrjet e përsëritura dhe të paprecedenta të Kryeministrit Edi Rama në punët e brendshme të bashkive, me raste flagrante në Bashkinë e Tiranës dhe së fundmi në Bashkinë e Vlorës.
Këto veprime përbëjnë shkelje të rëndë të parimeve kushtetuese të ndarjes së pushteteve dhe autonomisë vendore, themele të shtetit funksional dhe demokratik. Ato janë gjithashtu një atentat ndaj reformës territoriale dhe decentralizimit, të ndërtuara mbi parimin që vendimmarrja lokale duhet t’u përkasë institucioneve vendore të zgjedhura me votë të lirë nga qytetarët.
Sipas Kushtetutës së Republikës së Shqipërisë, neni 108, pika 4:
“Vetëqeverisja në njësitë vendore ushtrohet nëpërmjet organeve të tyre përfaqësuese.”
Ndërsa Karta Evropiane për Autonominë Vendore në nenin 3 thekson:
“Me autonomi lokale kuptohet e drejta dhe aftësia efektive e bashkësive vendore për të rregulluar dhe për të drejtuar, brenda ligjit dhe nën përgjegjësinë e tyre, një pjesë të konsiderueshme të çështjeve publike, në interes të popullsisë përkatëse.”
Partia e Lirisë paralajmëron se çdo përpjekje e Kryeministrit për të diktuar vendimmarrje administrative në bashki, për të emëruar apo shkarkuar drejtorë apo për të urdhëruar ndryshime në drejtimin lokal, përbën shkelje të hapur të Kushtetutës dhe ligjit për vetëqeverisjen vendore.
Këto veprime pa bazë ligjore dëshmojnë përpjekjen për kontroll absolut mbi pushtetet, duke trajtuar shtetin si pronë personale dhe politike.
Partia e Lirisë kërkon:
-
Ndalesë të menjëhershme të çdo ndërhyrjeje politike në punët e brendshme të bashkive;
-
Respekt rigoroz të autonomisë kushtetuese dhe ligjore të pushtetit vendor;
-
Ndërhyrje nga institucionet përkatëse, brenda dhe jashtë vendit, për garantimin e zbatimit të ligjit dhe mbrojtjen e autonomisë vendore;
-
Masa ligjore dhe institucionale ndaj çdo akti që cenon ndarjen e pushteteve dhe pavarësinë e organeve vendore të zgjedhura nga qytetarët;
-
Shoqatat përfaqësuese të bashkive, pa dallim bindjesh politike, të mbajnë qëndrime të qarta për mbrojtjen e autonomisë vendore dhe të ftohen zyrtarisht për monitorim nga Kongresi i Autoriteteve Lokale dhe Rajonale të Këshillit të Europës në Strasburg dhe institucionet e Komisionit Evropian.
Partia e Lirisë i bën thirrje shoqërisë civile, Këshillit të Europës dhe institucioneve të Bashkimit Europian që monitorojnë reformat demokratike, të reagojnë me vendosmëri ndaj këtij precedentit të rrezikshëm që minon demokracinë lokale dhe rendin kushtetues në Shqipëri.
“Shqipëria nuk mund të drejtohet me dorë të hekurt nga një njeri që kërkon të kthejë pushtetin në pronë personale. Demokracia nuk funksionon pa ndarje pushtetesh dhe pushteti vendor nuk është dekor ceremonial, por themel i shtetit demokratik, funksional dhe pranë qytetarit,” – përfundon deklarata.
