Policia e Kurbinit finalizoi me sukses operacionin e koduar “Fokusi”, që çoi në kapjen dhe arrestimin e një shtetasi me rrezikshmëri të lartë shoqërore, i shpallur në kërkim për vepra të rënda penale.
Në pranga ra shtetasi Orgest Mehi, alias Orgest Shehaj, 25 vjeç, banues në Fushë Kuqe, Kurbin, i cili ishte në kërkim nga drejtësia që nga dhjetori i vitit 2023.
Ky shtetas ishte shpallur në kërkim pasi Gjykata e Shkallës së Parë e Juridiksionit të Përgjithshëm Lezhë, më datë 09.02.2024, i kishte caktuar masën e sigurisë “arrest në burg”, për veprat penale:
-
“Sigurimi i kushteve dhe mjeteve për të kryer vrasje”, kryer në bashkëpunim;
-
“Mbajtja pa leje dhe prodhimi i armëve, armëve shpërthyese dhe i municionit”;
-
“Mosbindja ndaj urdhrit të punonjësit të policisë”.
Më 18 dhjetor 2023, në Fushë Kuqe, Orgest Mehi nuk iu bind urdhrit të efektivëve të Policisë për të ndaluar automjetin me të cilin lëvizte. Ai u largua me shpejtësi, duke rrezikuar jetën e punonjësve të Policisë.
Më pas, automjeti u gjet i braktisur në fshatin Gurëz, ku gjatë kontrollit u sekuestrua një armë zjarri snajper me precizion të lartë, me fishek në fole dhe një çantë me municion luftarak, që dyshohet se ishin siguruar për të kryer vrasje të porositur.
Materialet procedurale në ngarkim të të arrestuarit i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për vijimin e hetimeve dhe veprime të mëtejshme ligjore.
Policia e Kurbinit thekson se kontrollet dhe operacionet për goditjen e veprimtarive kriminale do të vijojnë pa ndërprerje, në bashkëpunim me strukturat e tjera ligjzbatuese.
