Policia spanjolle ka arrestuar tetë persona pas tre netësh përleshjesh midis grupeve të ekstremit të djathtë dhe emigrantëve nga Afrika e Veriut në një qytet në Spanjën juglindore, tha qeveria të hënën.
Trazirat erdhën pas një sulmi ndaj një burri në fund të të 60-ave, i identifikuar nga mediat si Domingo Tomas. Ai deklaroi për transmetuesin LaSexta se ishte sulmuar javën e kaluar në një varrezë nga dy burra që flisnin në një gjuhë që ai nuk e kuptonte. “Njëri prej tyre më hodhi përtokë dhe më goditi. Gjithçka ndodhi shumë shpejt,” tha ai.
Autoritetet arrestuan dy shtetas të huaj të dyshuar për përfshirje në sulm, ndërsa janë ende në kërkim të autorit kryesor, tashmë të identifikuar. Gjashtë persona të tjerë – pesë spanjollë dhe një me origjinë nga Afrika e Veriut – u arrestuan për krime si sulm, çrregullim publik, krime urrejtjeje dhe dëmtim prone, njoftoi Ministria e Brendshme.
Popullsia e Torre Pachecos përbëhet rreth një e treta nga emigrantë, përfshirë edhe gjeneratën e dytë. Zona përreth qytetit strehon një numër të madh punëtorësh sezonalë të bujqësisë, që mbështesin një pjesë të rëndësishme të ekonomisë së rajonit të Murcias.
Kryetari i Bashkisë, Pedro Ángel Roca, u bëri thirrje komuniteteve të qëndrojnë të qetë dhe të shmangin përplasjet:
“I kërkoj komunitetit të emigrantëve të mos dalin nga shtëpitë dhe të mos përballen me protestuesit, sepse përballja nuk sjell asgjë veç frikës.”
Ministri i Brendshëm, Fernando Grande-Marlaska, fajësoi retorikën anti-emigracion të ekstremit të djathtë dhe partive si Vox për nxitjen e dhunës, duke theksuar se kjo propagandë e lidh në mënyrë të pajustifikuar imigracionin me kriminalitetin. Ai shtoi se trazirat u organizuan përmes rrjeteve sociale.
Nga ana tjetër, lideri i Vox, Santiago Abascal, hodhi poshtë çdo përgjegjësi të partisë së tij për incidentet, duke akuzuar qeverinë për një politikë të dështuar migracioni.
Ndërkohë, ministrja e Migracionit, Elma Saiz, theksoi:
“Spanja nuk është një vend që përndjek emigrantët. Nëse ka arsye për të dalë në rrugë, është për të mbrojtur të drejtat e mijëra njerëzve që po jetojnë me frikë.”
Një banor lokal, Abdelali, emigrant nga Afrika e Veriut, i tha agjencisë Reuters se kishte frikë të dilte në rrugë:
“Ne duam paqe. Nuk kërkojmë asgjë tjetër.”
Trazirat rikujtojnë protestat e dhunshme anti-imigracion që tronditën qytetin El Ejido në Almeria në vitin 2000, pas vrasjes së tre qytetarëve spanjollë nga emigrantë marokenë — një kujtesë se tensionet etnike dhe sociale mbeten një plagë e hapur në disa pjesë të vendit.
