Gjatë konferencës së parë të përbashkët të organizuar nga Fondacioni Martens dhe Fondacioni “Liri dhe Demokraci”, drejtori ekzekutiv i Qendrës Martens, Tomi Huhtanen, theksoi se integrimi evropian i Ballkanit Perëndimor duhet të bazohet në standarde dhe merita, jo në kompromise politike.
Në fjalën e tij, Huhtanen u shpreh se krimi i organizuar, korrupsioni dhe problemet me sundimin e ligjit nuk mund të fshihen nën qilim, sidomos kur një vend ndodhet në procesin e integrimit në Bashkimin Evropian.
“Shqipëria ka bërë përparime mbresëlënëse, por ende ka shqetësime serioze për sundimin e ligjit, demokracinë dhe krimin e organizuar. Këto janë çështje që duhen adresuar para se të ndodhë anëtarësimi”, theksoi ai.
Sipas një sondazhi të realizuar nga Martens Center, që ai e përmendi gjatë fjalës së tij:
-
91% e qytetarëve evropianë kërkojnë që vendet kandidate të kenë institucione të pavarura që garantojnë shtetin ligjor.
-
38% janë pro zgjerimit, por kërkojnë ndryshime në mënyrën e zhvillimit të tij.
-
78% duan më shumë transparencë mbi progresin e vendeve kandidate.
-
64% interesohen për aspektet mjedisore në këtë proces.
Huhtanen solli si shembull rastin e Moldavisë, e cila, pavarësisht skepticizmit fillestar nga BE, ka përparuar me reforma dhe standarde, duke e shndërruar procesin e integrimit në një instrument transformimi.
Ai theksoi se procesi i anëtarësimit duhet të jetë një rrugë me dy kahje – vendet duhet të përmbushin kushtet, por edhe Bashkimi Evropian duhet të ofrojë mbështetje konkrete për reformat dhe zhvillimin e rajonit.
Në fund të fjalës, Huhtanen nënvizoi:
“Standardet dhe stabiliteti nuk janë në kontradiktë. Vetëm përmes meritës dhe reformave mund të arrijmë stabilitet të vërtetë. Ne kemi besim te Ballkani Perëndimor, besim te Shqipëria, por ende ka shumë punë për të bërë.”
