Pas pezullimeve, dënimeve dhe gjobave që e gjithë bota ndërkombëtare e sportit vendosi muajt e fundit ndaj Rusisë për shkak të dopingut, duket se ka ardhur koha për reagim. Dhe pas shumë polemikave, Rusia ka vendosur të kundërpërgjigjet, ose më saktë të reagojë ndaj këtij fenomeni që u shfaq kohët e fundit. Madje ndërhyrja ka ardhur nga Duma ruse, që ka vendosur ta quajë dopingun dhe përdorimin e substancave të ndaluara në sport si krim.
Duma aprovoi sot një ligj, që parashikon dënime të forta, madje ekstreme, ndaj trajnerëve, mjekëve dhe sportistëve që mbështesin dhe përdorin doping. Dënimet do të shkojnë nga gjoba që kapin shifrën e 4 mijë eurove (të barazvlefshme me 6 muaj rrogë në Rusi) deri pezullime në 3 vjet, apo liri me kusht për 12 muaj. Nëse dopingu është masiv apo kryhet në dëm të minorenëve, atëherë gjoba do të jetë më e rëndë (14 mijë euro) e gjithashtu edhe dënimet (deri një vit burg).
