Nga Artan Gjyzel Hasani
Pretendimi i kahershëm se e majta europiane dhe amerikane është krejt ndryshe nga e majta shqiptare është veç nje iluzion.
Në thelb e majta është njësoj në gjithë botën, ajo e majtë që ka fëmijërinë te Marksi, adoleshencën te Lenini dhe pjekurinë te Stalinët, Maot, Fidelët, Kim Ir Senet dhe Enverët e botës, pavarësisht kallajit dhe vernikut.
Dukuria “Donald Trump” e vërtetoi dhe e vërteton çdo ditë këtë. Brenda një periudhe 2-vjeçare e majta amerikane (demokratët) ia nxorri bojën sqimatare vetes dhe u shpalos si një organizatë revolucionare e tipit leninist bashkë me mediat dhe tellallet e tyre të botës internetore në luftën e tyre antiTrump.
Gënjyen, mashtruan, shpifën, dezinfirmuan publikun non stop me një amoralitet ekstrem çdo ditë e minutë. Kaluan në histeri kur Trump nuk iu përgjigj pyetjes direkte nëse do e njihte rezultatin e zgjedhjeve, por kur Hillary humbi filluan vetë ata të kërkojnë mosnjohjen e zgjedhjeve me mënyra krejt leniniste, demonstrata, protesta, thirrje masive për vetësakrifikim moral të Kolegjit Elektoral (!!!) , agjitatorë e propagandiste dhe celulat e tyre, aktore dhe persona publike të njohur për simpatitë e tyre komuniste, familja globale soroiste me vete patriarkun Xhorxh në krye, mbledhje fondesh për firma e para për të organizuar rikthimin ME ÇDO KUSHT E ÇMIM të të dëshpëruarës Hillary në Shtëpinë e Bardhë.
Madje edhe shtëpitë e njohura të modës u aktivizuan në këtë revolucion leninist amerikan, duke refuzuar të veshin një bukuroshe si Melani Trump, e cila me asetet e pamohueshme fizike fare mirë do bënte edhe pa veshjet e rrobaqepësve marksistë të Amerikës.
Dhe sa më shumë afron dita kur Donaldi i Tmerrshëm do ulet në Tryezën Ovale, aq më shumë rritet histeria leniniste kundër tij me çdo mjet e mënyrë…
Kjo histeri leniniste e së majtës amerikane, e aleatëve të saj të natyrshëm (organizatat feministe dhe LGBT) dhe e mbështetësve të saj nga të katër anët e planetit e shpjegon më së miri arsyen pse nuk pati kurrë një Nuremberg për Komunizmin edhe pse janë mbushur mbi 30 vjet nga shembja e tij…
Bishti i qenit mbetet njesoj bisht qeni kudo dhe sido që të rritet qeni, si zagar në Shqipëri apo si qen race në Amerikë…
