Ministrja e Mbrojtjes Mimi Kodheli ka deklaruar disa ditë më parë se buxheti për mbrojtjen është në nivelin 0.8% të PBB-së. Ndërsa në reagimin zyrtar të ministrisë jepet një shifër tjetër. Në të thuhet se buxheti për vitin 2017 është në nivelin 1.1% të PBB -së çfarë nënkupton një diferencë prej 40 milion dollarësh në një paralelizëm me shifrën e deklaruar nga ministrja Kodheli.
Në reagimin e ministrisë theksohet se: “Ashtu siç kemi konfirmuar në Komisionin e Sigurisë Kombëtare gjatë prezantimit të buxhetit të alokuar të ministrisë së mbrojtjes, i ribëjmë me dije institucionit të presidentit, si dhe deputetëve të kuvendit sa më poshtë: Buxheti planifikuar për vitin 2017 përfaqëson 1.1% të Prodhimit të Brendshëm Bruto, ku përfshihen fondi i pagave dhe pensioneve, shpenzime për misione, investime, pensione të ish-ushtarakëve”.
Në deklaratë theksohet se ministria e harton buxhetin e vetme pa qenë e nevojshme të konsultohet me presidentin. Ky buxhet nuk prek arritjen e objektivave të vendit në fushën e mbrojtjes dhe detyrimet kushtetuese dhe angazhimet tona në NATO. Sekretarja e përgjithshme e Ministrisë së Financave Geraldina Prodani, është shprehur se angazhimi i qeverisë ndaj NATO-s ka qenë tejet serioz megjithatë atë çka shteti shqiptar ka dhënë kundrejt këtij angazhimi ka qenë rreth 0.9% e GDP-së.
