Pas takimit në Berlin mes kancelares Angela Merkel dhe kryeministrit Edi Rama, ka reaguar edhe kreu i Partisë Demokratike Lulzim Basha. Ai është shprehur se Shqipëria është me fat që mbështetet nga Gjermania në rrugën e integrimit evropian dhe ka theksuar se PD-ja do të angazhohet në organizimin e zgjedhjeve të lira dhe reformës në drejtësi.
‘’Shqipëria është me fat që ka mbështetjen e Gjermanisë në përpjekjet e saj për përparim dhe integrim europian. Ne i jemi veçanërisht mirënjohës Kancelares Merkel për mirëkuptimin dhe mbështetjen e saj të vazhdueshme ndaj Shqipërisë.
Dua ta siguroj Kancelaren dhe popullin gjerman se shqiptarët janë të vendosur të përqafojnë të gjitha vlerat europiane dhe të ndërtojnë një shoqëri të denjë për të gjithë, duke luftuar krimin, drogën, korrupsionin dhe duke e çliruar politikën prej tyre.
Partia Demokratike dhe unë do të marrim përgjegjësinë tonë në gjendjen ku ndodhet vendi, veçanërisht për te siguruar zgjedhje te lira dhe të ndershme dhe zbatimin sa më parë të reformës në drejtësi’’, shkruan Basha.
