Bombardohet eskorta e presidentit të Filipineve, 9 të plagosur
Nëntë pjesëtarë të ekipit të sigurisë së presidentit të Filipineve, Rodrigo Duterte, kanë mbetur të plagosur si pasojë e një sulmi me bombë. Një nga të plagosurit ndodhet në gjendje kritike për jetën, ndërsa presidenti Duterte është shëndoshë e mirë, pasi nuk ndodhej me mbrojtësit e tij.
“Ne i sigurojmë njerëzit tanë trima, që për hir të detyrës vënë në rrezik jetën e tyre se kreu i tyre nuk do t’i braktisë kurrë ata”, tha zëdhënësi i presidentit, Martin Andanar.
Sipas autoriteteve vendase, shpërthimi ndodhi rreth orës 10:45 të paradites së sotme (sipas orës lokale), ndërkohë që eskorta e presidentit po shkonte në shtabin e ushtrisë në Marawi të Filipineve.
