Gjatë kontrollit në lokalet e natës në kryeqytet policia nxorri nga rrjetet e shfrytëzimit të prostitucionit 7 vajza të reja, 3 prej të cilave janë të mitura, raportohet në media. “Tv Klan” ka publikuar pamje filmike të disa prej këtyre aksioneve, ku gjithsej në sitën e policisë kanë kaluar 50 lokale në kryeqytet.
Një 16-vjeçare nga qyteti i Durrësit, njëra prej vajzave të shfrytëzuara, ka rrëfyer për policinë mënyrën si e shfrytëzonte për prostitucion njëri nga ortakët e një lokali të tillë. Ervin Hodaj, drejtori i Policisë së Tiranës, thotë se janë shoqëruar me dhjetëra vajza, shqiptare e të huaja. Sipas tij këto janë lokale kryesisht që ofrojnë striptizëm dhe një pjesë e vajza vijnë edhe nga Serbia. Hodaj shpjegon se këto lokale përdoren edhe për veprimtari të tjera kriminale, kryesisht në shpërndarjen e drogës.
Sipas policisë grupi i personave që vepronte në zonën e rrugës së “Myslym Shyrit”, ishte një nga më aktivët në kryeqytet, me më tepër se 25 persona të arrestuar dhe me rreth 500 mijë euro xhiro vjetore dhe dhjetëra kilogramë heroinë e kokainë të shitur. Drejtori i Policisë Hodaj shton më tej se gjatë këtij viti janë regjistruar 8 procedime me metoda speciale të hetimit, disa prej të cilave janë përfunduar me arrestime dhe disa të tjera janë ende në ndjekje.
http://dai.ly/x53ynho
Discussion about this post