Pezullojnë punën 100 punëtorët e HEC-it në Moglicë, ka Asbest

Njëqind puntorët që po punojnë për ndërtimin e HEC-it në fshatin Moglicë të Korçës kanë pezulluar punën.

Sipas tyre gjatë gërmimeve ata kanë hasur Asbest.

Punëtorët janë të frikësuar nga kjo situatë sepse sipas tyre Asbesti ka rrezik për jetën.

“ Ne kemi dëgjuar për efektet e Asbestit. Grimcat e tij shkaktojnë kancer”, shprehen ata.

Po kështu ata pohojnë se firma nënkontraktore që po bën punimet është e pashqetësuar për këtë situatë.

Ata i bëjnë thirrje shtetit që të bëjnë analizat dhe të shohin gjendjen, pasi vetë e kanë të pamundur.

“Shteti të vijë të bëjë verefikimet. Ne dimë ku ka Asbest”, shprehen ata.

Për Shefin e Departamentit të Mjedisit, Arben Luzatin, Asbesti shkakon kancer në mënyra të ndryshme. Sipas tij minerali nuk është i rrezikshëm kur është kompakt, por kur shpërbëhet lëshon fije në frymëmarrje. Ai shton për “News 24” se rreziku më i madh është në apartamentet e vjetra.

Edhe në raportin e vitit 2011 për praninë e Asbestit në vendin tonë, shkruhet se ai mund të shkaktojë kancer.

Po kështu thuhet se në total janë rreth 90.000 ton Asbest të përhapur aktualisht në Shqipëri. Zonat me raport me të lartë janë Durrësi, Elbasani dhe Vlora. Në komunizëm importohej nga Kina dhe Rusia.