Forcat policore kanë arritur të identifikojnë personat që kërcënuan me armë mbrëmjen e kaluar disa qytetarë, të cilët telefonuan 112-in për ndihmë.
“Grupi hetimor në vendin e ngjarjes ka identifikuar pronarin e mjetit shtetain B. K., gjithashtu ka arritur të identifikojë se përdorues i këtij mjeti është edhe shtetasi K. L., 25 vjeç, me precedent penal në fushën e vjedhjes.”, shkruhet në njoftimin e policisë.
Mbrëmjen e kaluar, një thirrje për ndihmë në numrin e emergjencave 112, ka vënë në lëvizje urgjente policinë e Tiranës. Kjo sepse personi që ka telefonar ka deklaruar se është kërcënuar me armë nga një automjet tip “Alfa Romeo” .
Forcat policore u vunë menjëherë në ndjekje por nuk arritën t’i kapnin autorët, të cilët e hipën makinën mbi një trafikndarëse dhe e braktisën aty për t’u larguar më pas në drejtim të paditur. Pas kontrollit që i bënë makinës, efektivët e policisë gjetën një sasi të vogël kannabis brenda në kroskot.
Njoftimi i policisë:
“Më datë 02.12.2016, rreth orës 14:40, ka ardhur një telefonatë në numrin e emergjencave 112, se në kryqëzimin e rrugës “Mujo Ulqinaku”, me rrugën e “Kavajës”, në automjetin tip “Alfa Romeo”, dyshohet se personat në brendësi të saj, qarkullojnë me armë zjarri. Rreth orës 20:30, shërbimet e skuadrës “Shqiponjat”, kanë konstatuar mjetin në afërsi të ish restorant Durrësit, të cilët duke përfituar nga mbyllja e semaforit, kanë krijuar pak distancë të mjaftueshme për të braktisur mjetin dhe për tu larguar. Nga kontrolli i ushtruar në mjet janë gjetur dy doza me lëndë të dyshuar narkotike të llojtë Cannabis Sattiva. Grupi hetimor në vendin e ngjarjes ka identifikuar pronarin e mjetit shtetain B. K., gjithashtu ka arritur të identifikojë se përdorues i këtij mjeti është edhe shtetasi K. L., 25 vjeç, me precedent penal në fushën e vjedhjes. Po punohet për gjetjen e personave të cilët ndodheshin në këtë mjet.”
Discussion about this post