Pas disa dekadash, më në fund fëmijët e emigrantëve shqiptarë në Çamëri do të kenë mundësi të mësojnë gjuhën shqipe. Më saktë fëmijët në qytetet e Artës edhe Atikës.
Kryetarja e Lidhjes së mësuesve shqiptarë (LMSHG) në Greqi, Anila Kila, bën me dije se mësimet e para kanë filluar në mjediset e shkollës publike Nr.8 në qytetin e Artës si edhe në shkollës publike Nr.1 në Spata të Atikës.
Kryetarja e LMSHG-së, ka falenderuar autoritet e bashkive në dy qytetet si dhe mësuesit e angazhuar në këtë mision kaq të rëndësishëm.
“Me gëzim të madh ju njoftoj se sot mora lajmin për fillimin e mësimeve të gjuhës shqipe në mjediset e shkollës publike nr. 8 të qyetit të Artës dhe gjithashtu mora lejen për fillimin e mësimeve në mjediset e shkollës publike nr. 1 në Spata të Atikës. Puna serioze e mësuesve dhe e organeve drejtuese të LMSHG-së ka bërë që të fitojmë besimin e pushtetit lokal këtu, në Greqi dhe të vazhdojmë mësimdhënien pa asnjë problem nga ana e tyre. Falënderoj nga zemra pushtetin lokal të bashkive në Arta dhe Spata – Artemisë, për ndihmën e madhe, duke na bërë të mundur zhvillimin e mësimit në mjediset e shkollave publike dhe mbështetjen për mbajtjen gjallë të gjuhës, kulturës dhe traditave tona. Falënderoj mësuesen e kursit të MPGjSh-së në Arta, zonjën Sonila Todo, për përpjekjet e saj dhe i uroj në emër të të gjithë kolegëve: Punë të mbarë! Falënderoj gjithashtu edhe zotin Anastas Kozdine, kryetarin e Shoqatës “Përmeti”, për ndihmën e madhe që ka na ka dhënë!”, shprehet Znj.Kila.
Discussion about this post