Mundësia që call center-at në Shqipëri mund të zhvendosen duke rrezikuar rreth 25.000 vende pune, i ka shtyrë autoritetet shqiptare të zhvillojnë takime dhe së fundmi t’i dërgojnë edhe një letër senatit italian.
Në letrë, ministria e Mirëqenies Sociale në Shqipëri, ajo e Tregtisë dhe Sipërmarrjes, ministria e Ekonomisë dhe ajo e Turizmit, kanë shprehur argumentat pse call center-at nuk duhet të ritransferojnë veprimtaritë e tyre.
Një ndër argumentat është se ndërmarrjet italiane nuk do të ritransferojnë veprimtaritë e tyre në Itali, por do t’i transferojnë në vendet e Bashkimit Europian ku kostoja e punës është më e ulët.
“Ky dekret, pavarësisht se ka për objektiv mbrojtjen e punësimit të të rinjve në Itali, në fakt, në zbatim të tij, nuk do të mund të sjellë këtë rezultat, pasi në të përjashtohen të gjitha vendet e Bashkimit Evropian (duke përfshirë Rumaninë, Kroacinë, Slloveninë etj.), kur rezulton që ka shumë kompani italiane të këtij sektori, të cilat kanë transferuar ose janë duke transferuar aktivitete që kryhen në Shqipëri. Në fakt, nëse teksti i miratuar në Dhomën e Deputetëve do të mbetet i pandryshuar, dekreti do të penalizojë vetëm Shqipërinë, duke çuar në rënie të investimeve të kompanive contact center që operojnë në vendin tonë dhe një ndikim të ndjeshëm në punësimin e të rinjve tanë”, citohet ndër të tjera.
Në vijim, argumentohet edhe se propozimi i ri ligjor rezulton në kontrast me marrëveshjet e ndryshme bilaterale lidhur me shtetit italian.
“Ndryshimet ligjore vijnë në një kohë kur Shqipëria ka marrë statusin e vendit kandidat me mbështetjen e fortë të Italisë nëpërmjet ministrit të Jashtëm, Paolo Gentiloni.”, argumentohet në letrë ku kërkohet që të rishikohet teksti i dekretit.
Discussion about this post