Që prej datës 12 nëntor, në Ministrinë e Drejtësisë në Tiranë ka mbërritur një nga dosjet më voluminoze kundër një prej emrave më të përfolur të krimit në të dyja anët e kufirit.
Ky lajm është konfirmuar për Top Channel nga burimet diplomatike greke.
Klement Balilin është ai më i përfoluri, madje i quajtur edhe si “Eskobari i Ballkanit”.
Balili është shpallur në kërkim nga autoritetet greke shumë muaj më parë dhe vazhdon të jetë në kërkim, edhe nga ato autoritetet shqiptare.
Por këto të fundit shpesh janë ankuar se nuk kishin prova të mjaftueshme ndaj Balilit, për t’i nisur një proces gjyqësor.
Por tashmë në duart e tyre gjenden 10 mijë faqe, që sipas burimeve të televizionit kombëtar, përmbajnë fakte dhe dëshmi për trafik droge, njerëzish, por edhe vrasje, të cilat i mvishen Klement Balilit dhe grupit të tij të strukturuar kriminal.
Kjo dosje është sjellë prej gati tre javësh e përkthyer në shqip, pikërisht për të hequr çdo lloj argumenti nga pala shqiptare, veçanërisht nga Ministria e Drejtësisë për vonesa në dërgimin e dosjes në Prokurorinë shqiptare.
Sipas televizionit, dërgimi i së njëjtës dosje në greqisht zvarritet ende nga autoritetet shqiptare.
Dosja “Balili”, e përkthyer kësaj radhe në shqip nga vetë nga grekët, do t’i dorëzohet prokurorisë shqiptare paraditen e së mërkurës.
Discussion about this post