Dy ditë pas krimit të rëndë që tronditi jo vetëm qytetin e Korçës, por të gjithë Shqipërinë, ka reaguar babai i 24-vjeçares, Marsela Toshi. Astrit Behari akuzon të bijën si shkaktaren e krimit të 3-fishtë që kreu bashkëshorti i saj, Naum Toshi.
65-vjeçari nga fshati Kraps i Fierit ka deklaruar së fundmi për “GSH” se e ka bërë hasha të bijën dhe nuk do ta shikojë me sy sa të jetë gjallë. Ai udhëtoi ditën e djeshme bashkë me të birin në drejtim të Korçës, për t’iu bashkuar ceremonisë mortore ku nëna e fëmijëve nuk u lejua të ishte e pranishme.
Ka qenë vetë ai i dhe i biri që kanë kërkuar që Marsela të mos merrte pjesë në varrim, për të shmangur ndonjë përplasje të mundshme midis dy familjeve krushqi. Mes dhimbjes, ai shprehet se nuk mund ta falë të bijën, por as Naumin për krimin e llahtarshëm që ka kryer.
“Pashë gjithçka në televizor. U tmerrova kur dëgjova se çfarë u kishte ndodhur dy nipërve të mi. Më dridhej zemra çdo sekondë, sa herë thoshin se dy djemtë e vajzës sime ishin mbytur me tel teksa ishin në gjumë (qan). Nuk ka gjë më të rëndë për një prind se kjo që ndodhi. Vajza ime dhe dhëndri le të merrnin rrugët. Të bënin çfarë të donin me jetën e tyre, por me fëmijët çfarë patën?”, është shprehur ndër të tjera Behari.
61-vjeçari ka treguar se mes dy partnerëve kishte vetëm grindje, tension që ua kishin përcjellë edhe familjarëve të tyre. “U nda nga burri i parë, sepse grindej edhe me atë dhe nuk shkonin me njëri-tjetrin. Edhe me burrin e dytë, e njëjta histori. Vajza ime është fajtore, sepse nuk e dëgjonte bashkëshortin. Nëse donte liri, ime bijë të mos martohej. Këtë ia kam thënë me qindra herë.”, ka vijuar më tej, gjyshi i dy djemve të mitur që u vranë nga babai i tyre, Naum Toshi.
Discussion about this post