Habit profesori grek: Greqia të pranojë spastrimin etnik që u është bërë çamëve!

Një professor grek i ka habitur të gjithë me deklaratën e tij në prezantimin e një studimi shkencor pranë Universitetit “Maqedonia” të Selanikut, të organizuar nga Fondacioni grek për Politikën Europiane dhe të Jashtme (ELIAMEP).

Në studimin në fjalë, mediat shqiptare dhe greke trajtohen si shumë konservatore, me këndvështrime egocentrike dhe të pabalancuara, edhe që pasqyrojnë në mënyrë negative grekët në Shqipëri dhe shqiptarët në Greqi.

Por, profesori Kostandinos Tsitselikis, i cili ishte i ftuar për të interpretuar studimin, i habiti kur përveç këtyre shtoi se Greqia duhet të pranojë spastrimin etnik që i është bërë popullsisë çame.

“Mirë apo keq, historia ka kaluar dhe nga ana tjetër duhet që edhe pala greke të thotë ‘Po, u bë një spastrim etnik në atë kohë nga ushtria demokratike e Greqisë. Disa prej çamëve ishin bashkëpunëtorë të gjermanëve, u larguan të gjithë dhe nuk mund të kenë tashmë të drejta te pasuritë’ dhe të mbarojë kjo çështje”,  është shprehur profesor Tsitselikis.

Ndërkohë një tjetër professor, Joannis Armakolas u shpreh: “Shumë nga stereotipet dhe klima e keqe që ekzistojnë në popujt e dy vendeve, ose si e shikojnë njëri-tjetrin qytetarët e tyre kalon nga mediet”.

Sipas hulumtuesit Panagiotis Pasxalidhis, prej vitit 2014 janë zhvilluar dy vite studime në analizat e 949 artikujve të 5 gazetave kryesore të Greqisë, nga spektri i majtë deri tek ai i djathtë. Më shumë janë pasqyruar 4 ngjarjet kryesore të këtij viti në lidhje me Shqipërinë, si presidenca greke, çështja “Kareli”, reforma territoriale dhe ndeshja Serbi-Shqipëri. Të gjitha janë trajtuar me syzet e bindjeve të çdo gazete, ku shtypi i majtë ka qenë më kritik ndaj nacionalizmit, ndërsa ai i djathtë ka ruajtur stereotipet e shfaqura gjatë viteve ’90, megjithëse vihet re një distancim nga ai këndvështrim.

Të pranishmit, kryesisht studentë, kanë ndjekur edhe studimin e bërë nga Instituti shqiptar i Marrëdhënieve Ndërkombëtare, ku në 223 artikujt e analizuar nga 3 gazeta shqiptare në 6 muaj të vitit 2014, këndvështrimi varet nga rasti.