Meta: Të ecim më shpejt me zbatimin e Vetting-ut dhe Reformës në Drejtësi

Kryetari i Lëvizjes Socialiste për Integrim, Ilir Meta, ka përshëndetur opinionin e Komisionit të Venecias për ligjin e Vetting-ut dhe shprehu besimin se tani edhe Gjykata Kushtetuese do të ketë mundësinë, që sa më parë të jetë e mundur, të japë gjykimin e saj përfundimtar për këtë çështje.

“Të ecim më shpejt me zbatimin ligjit për Vetting-un, por edhe me zbatimin e reformës në drejtësi, në tërësi si reforma më e rëndësishme, me suksesin e të cilës lidhet edhe fati i shumë prioriteteve dhe reformave të tjera në vend,”  u shpreh ai.

Deklaratat e Metës erdhën në përfundim të mbledhjes së Komitetit Drejtues Kombëtar të LSI-së dhe pas reagimit të BE-së dhe Ambasadës së SHBA-ve në Tiranë, të cilat gjithashtu përshëndetën opinionin e Komisionit të Venecias dhe bën thirrje për zbatim të Vetting-ut.