Pak ditë më parë, Presidenti i Republikës së Shqipërisë, Bujar Nishani, dekretoi datën e zgjedhjeve parlamentare që do të jetë 18 qershori 2017. Por jo të gjithë do të lejohen të votojnë, këtu përjashtohen qindra të dënuar.
Ligji i dekriminalizimit parashikon që një kategori e të dënuarve me vendim të formës së prerë, të mos kenë të drejtë të votojnë, shkruan “GSH”. Do të hiqen nga listat e votuesve, të gjithë të dënuarit që kanë kryer vepra penale që parashikohen në pikat “a” e “b” të nenit 2, të ligjit “Për garantimin e integritetit të personave që zgjidhen, emërohen ose ushtrojnë funksione publike”, ose siç njihet ndryshe ligji për dekriminalizimin.
“Kur një shtetas dënohet me vendim përfundimtar të formës së prerë për një nga veprat e parashikuara nga shkronjat ‘a’ dhe ‘b’ të nenit 2 të këtij ligji, gjykata e rrethit gjyqësor që ka marrë vendimin, i dërgon një kopje të vendimit Drejtorisë së Përgjithshme të Gjendjes Civile, e cila merr masa për pezullimin e së drejtës së votës dhe ngrirjen e rekordit zgjedhor të shtetasit në bazën e të dhënave të Regjistrit Kombëtar të Gjendjes Civile.”, përcakton ndër të tjera ligji i dekriminalizimit.
Ky pezullim pritet të zgjasë deri në përfundim të afatit të përcaktuan në nenin 4, pika 8, të ligjit. Me përfundimin e pezullimit, Shërbimi i Gjendjes Civile e heq pezullimin. Personat që do të evidentohen brenda muajit Dhjetor, do të njoftohen përmes një formulari ku do të shkruhet: “Ju njoftojmë se për zgjedhjet për Kuvendin të datës 18.06.2017, në mbështetje të germave ‘a’ dhe ‘b’, të pikës 1 të nenit 2, të ligjit nr.138/ 2015, ‘Për garantimin e integritetit të personave që zgjidhen, emërohen ose ushtrojnë funksione publike’, si shtetas që jeni subjekt i këtij akti ligjor, nuk jeni të përfshirë në ekstraktin e përbërësve zgjedhorë të qendrës së votimi.
Discussion about this post