Pak orë pasi Policia e Tiranës bëri me dije se ka nisur procedimin penal në gjendje të lirë ndaj Sokol Nanos, ka ardhur edhe reagimi i këtij të fundit.
Në një lidhje telefonike për News 24, djali i ish-kryeministrit Fatos Nano tregoi se lokali që administron në Bllok ka qenë pjesë e kontrollit të policisë për drogë, por pasi kanë kontrolluar shumë klientë, policët janë larguar.
Sipas tij, blutë e kryeqytetit kanë hyrë befasisht në lokal dhe nuk kanë paraqitur asnjë mandat, por mohon të jetë proceduar penalisht.
“Nuk kanë patur mandat, por nuk besoj që ju duhet mandat për të bërë atë lloj kontrolli”, ka thënë Nano duke shtuar se, “As procesverbal, asgjë…”
38-vjeçari rezulton administrator i një lokali në zonën e ish-bllokut në kryeqytet. Procedimi penal nisi për shkak se pas një kontrolli në lokalet e ish-bllokut, policia ka gjetur dy punonjës të pasiguruar të cilët shërbenin kuponin tatimor.
Discussion about this post