Shtëpia e Bardhë akuza Trump-it: Kemi prova, Rusia të ndihmoi në zgjedhje

“Presidenti Donald Trump ishte “padyshim në dijeni” se Rusia ndërhyri në zgjedhjet amerikane për ta favorizuar në fushatë”.

Kjo është akuza më e fundit që vjen nga Shtëpia e Bardhë, aty ku do të banojë miliarderi amerikan pas 20 janarit.

Sekretari i shtypit në Shtëpinë e Bardhë, Josh Earnest, është shprehur se përfitimi i ardhur nga Rusia për Trump është mjaft i qartë.

“Ka prova të mjaftueshme që diheshin që para zgjedhjeve, dhe në shumicën e rasteve përpara tetorit, që Trump është favorizuar. Madje ka qenë vetë kandidati republikan që i ka kërkuar Rusisë të hakojë kundërshtaren e tij. Ky mund të jetë një indikacion se ai ka qenë plotësisht në dijeni se Rusia ka qenë e përfshirë, dhe se përfshirja ka pasur impaktin e vet negativ në fushatën e kundërshtares së tij”, tha Earnest.

Sipas CIA-s,  hakimet e Rusisë kanë ndihmuar Trump në suksesin e tij në zgjedhjet e 8 Nëntorit, akuza të mohuara nga stafi i presidentit të ri të SHBA-ve.