Dekreti i Presidentit Bujar Nishani për rikthimin në Parlament të ligjit për “menaxhimin e integruar të mbetjeve” pritet të diskutohet seancën e kësaj jave dhe që pritet të jetë një “provim” i rëndësishëm për koalicionin PS-LSI.
Pas debatit mes kreut të opozitës shqiptare, Lulzim Basha dhe kreut të grupit parlamentar të LSI, lidhur me votimin e amendamentit “Vasili” për koncesionin e laboratorëve, vëmendja është zhvendosur në shpërndarjen e votave në parlament mes tre partive kryesore, PS, PD dhe LSI.
Sipas një analize të votave nga ABC News, PS ka 60 deputetë të regjistruar në grupin e saj parlamentar, por me votën e Tom Doshit, Armando Prengës, Mirela Ferracakut dhe Mhill Fufit, ata shkojnë në 64 vota, sërish të pamjaftueshme për të rrëzuar dekretin e presidentit Nishani.
PD ka 45 vota në parlamentin shqiptar, por me një përllogaritje të thjeshtë, nëse këtij numri do i bashkohen edhe votat e deputetëve Fatmir Mediu dhe Agron Duka, Ben Blushi dhe Mimoza Hafizi, Vangjel Dule dhe Nard Ndoka, të shpallur publikisht kundër ligjit për importin e mbetjeve, situata mund të ndryshojë. Me 5 vota të PDIU-së të deklaruara kundër ligjit, shkohet në 56 vota, pa llogaritur Lëvizjen Socialiste për Integrim.
Kjo e fundit ka 20 vota dhe mund të përmbysë gjithçka, pra mund të jetë vendimtare për fatin e dekretit.
Më herët, LSI dhe kreu i saj Ilir Meta janë shprehur kundër importit të mbetjeve, megjithëse në seancë plenare një pjesë e deputetëve të saj votuan Pro. (A.R/SHUPLAKA)
Discussion about this post