Kancelarja gjermane Angela Merkel ka reaguar lidhur me masakrën e ndodhur në Berlin mbrëmjen e djeshme ku mbetën të vdekur 12 persona ndërkohë që 48 të tjerë janë plagosur. Ajo tha se kishte pasur paralajmërime nga Shërbimet Sekrete për sulme të mundshme terroriste në tregjet e Krishtlindjes.
Në konferencën për mediat, Merkel shpjegoi se autori i krimit është një refugjat pakistanez që kishte kërkuar azil në Gjermani dhe vijonte të qëndronte në një kamp azilkërkuesish. Ajo shprehu tronditjen për ç’ndodhi dhe besimin se ngjarja do të zbardhet.
“Jam e tronditur për atë që ndodhi. Dyshohet se është sulm terrorist. Shpreh besimin se hetimet do të vijojnë dhe ngjarja do të zbardhet. Një vendim i tillë do të dënohet aq rëndë sa e lejon ligji. Shumë prej të plagosurve që mbetën dje, janë ende duke luftuar për jetën.”, u shpreh ndër të tjera Merkel.
“Miliona njerëz, duke përfshirë edhe veten, pyesim veten se si mund të jetojmë me frikën se gjatë një shëtitje në një treg Krishtlindje, një vrasës mund të marrë kaq shumë jetë.”, ka vijuar më tej ajo. (XH.A)
Discussion about this post