Kryetari i PS-së, Edi Rama, duke iu referuar zgjedhjeve të 2017-ës, theksoi se qëllimi i Partisë Socialiste është të vijojë koalicionin me LSI-në. Duke u ndalur në këtë çështje, ai i propozoi haptazi Ilir Metës vazhdimin e koalicionit edhe në zgjedhjet e ardhshme.
“Ne do të fitojmë në zgjedhjet e ardhshme më shumë se ç’fituam në të kaluarën. Qëllimi ynë strategjik është të jemi bashkë në koalicion me LSI. Të madhit i bie të thotë çfarëdo, të voglit i takon të mendohet.
Dëgjoni miqtë e mi: Kjo është strategjike, nuk ka lidhje me sjelljet e caktuara. Ne duhet ta shohim këtë në planin strategjik. Çfarë ka fituar Shqipëria nga ky koalicion. Ta lëmë se ç’do ishte bërë më shumë. Nuk janë njerëzit që korruptojnë sistemet, janë sistemet që korruptojnë njerëz.”
Më tej, kryetari i PS-së bëri me dije edhe se është “pro” zgjerimit të koalicionit që e sheh si mundësi për realizmin e një sërë reformash. Ai tha se në historinë e Shqipërisë, do të mbahet mend gjatë qeverisja e këtij koalicioni.
“Theksoj se patjetër që koalicionin do ta zgjerojmë sepse duam të realizojmë një varg reformash. Për qendrën e majtë, zgjerimi me aleatë të tjerë është një element i domosdoshëm për aq kohë sa garanton reformat. Ajo që unë di është që kjo parti, kjo periudhë qeverisëse do të kujtohet gjatë. Ne do të arrijmë të vendosim themele. Në mbyllje të fjalimit më të gjatë të këtij viti falenderoj ministrat, deputetët, përfaqësuesit tanë në qeverisjen vendore.”, u shpreh Rama. (XH.A/SHULAKA)
Discussion about this post