“Dekriminalizimi” çon në gjyq rreth 40 zyrtarë, 50 të tjerë janë shkarkuar nga detyra

Me hyrjen në fuqi të ligjit për “Dekriminalizimin” Sektori i verifikimit në Prokurorinë e Përgjithshme ka dërguar në gjyq rreth 40 persona me akuzën e “falsifikimi të formularëve”. 

 

Sipas asaj që raporton ABC News, këta të pandehur nuk kanë pasqyruar ose kanë evidentuar të dhëna të rreme në formularin e deklarimit duke mohuar të kaluarën e tyre kriminale. Në mesin e 40 personave, që tashmë kanë përfunduar në gjyq, janë zyrtarë të ndryshëm të administratës publike apo edhe institucioneve tjera kushtetuese. 

 

Burime zyrtare nga Sektori i verifikimit në Prokurorinë e Përgjithshme i thanë Abc News se 50 persona të tjerë janë shkarkuar nga detyra pas përpilimit të formularit të dekriminalizimit, pasi u ndalohet të ushtrojnë funksione publike. Mes të larguarve ishin edhe anëtarë të këshillave të ndryshëm bashkiakë të gjithë Shqipërisë.

 

Nga hyrja në fuqi e ligjit për “dekriminalizimin” Prokuroria ka verifikuar mbi 500 raste. Këto verifikime, janë kryer pas kërkesave të institucioneve të ndryshme në vend, ku numrin më të madh të tyre e ka bërë Deparatmenti i Administratës Publike.

 

 

Pak ditë më parë Prokuroria e Përgjithshme kërkoi heqjen e mandateve për deputetët Shkëlqim Selami dhe Dashamir Tahiri dhe kryetarit të Bashkisë Kavajë Elvis Roshi, me pretendimin se nuk kanë deklaruar në formularin e dekriminalizimit dënime që kanë marrë në shtete të ndrsyshme të Europës. (A.R/SHUPLAKA)