Tre ditë më parë Gjykata vendosi të gjobitë me 400 mijë lekë mjekët të cilët u shpallën fajtorë për vdekjen, gruas së portierit të kombëtares Alban Hoxhës, ndërsa sot kanë reaguar ashpër babai dhe vëllai i saj.
Babai dhe vëllai i Doriana Hakës, 25-vjeçares që humbi jetën pas lindjes së fëmijës së saj, e cilësojnë fyes dhe qesharak vendimin e gjykatës.
Madje, duke folur në emisionin “Kjo javë” në “News 24” babai i Dorianës u shpreh se jeta e vajzës së tij u barazua me një gërvishtje makine.
“Ne si familje këtë vendim e përjetuam sikur më vranë prapë vajzën. U befasova nga ai vendim, është skandaloz. Nuk e di ku e gjeti guximin, që dha dënimin me 400 mijë lekë, e krahasoi vajzën time me një lopë a një gërvishtje makine. Një gjyqtar i korruptuar. Mua fëmijë 25 vjeç më ka hyrë në dhe për shkak të gabimit të mjekëve”, u shpreh Enver Haka mes lotësh.
Ndërsa vëllai i Dorianës, u shpreh se vdekja e së motres, u trajtua sikur të ishte një gabim i thjeshtë administrativ.
“Vendimin do ta cilësoja tallës dhe fyes për familjen tonë. U dha një vendin sikur të ishte një gabim administrativ, dhe jo një gabim që i mori jetën një njeriu”, tha ai.
Mbi të gjitha Enverit i vjen rëndë, që dy mjekët janë kthyer sërish në krye të detyrës.
“Kjo anestezistja vrasësja e ka marrë me dhunë vajzën e ka futur aty. E ka futur si bagëti aty. Plus kësaj, kjo mjeke duke shitur mend edhe kësaj dite në spital. Ma vdiq fëmijën, edhe shet mend në spital”, tha zoti Haka.
Pavarësisht se u shpallën fajtorë, kirurgu Petrit Rexhepi dhe anestezistja Elona Burba u dënuan vetëm me 400.000 lekë gjobë. Por, prokuroria kishte kërkuar “arrest me burg” 5 vjet për të dy mjekët.
Gruaja e portierit të kombëtares Alban Hoxha, ndërroi jetë më 19 nëntor të 2014-ës, si pasojë e një komplikacioni shëndetësor pas lindjes së fëmijës. (D.D/Shuplaka)
