Një libër për Ibrahim Bashën, dëshmorin e Atdheut që u vra në Lazarat. Sot drejuesit kryesorë të Policisë së Shtetit kanë promovuar krijimin e Kujtim Boriçit dhe Arben Dukës “Heroizëm i shkruar me gjak atdhedashurie”.
“Ju faleminderit që fjalët e shpirtit i keni kthyer në shkronja. Kur flasin poetët komentet janë të tepërta, por sot ky aktivitet të obligon që edhe të komentosh. Faleminderit Ibrahim që ishe pjesë fizike e jona dhe që tashmë do të mbetesh përjetësisht pjesë e shpirtit dhe burim frymëzimi për ne. Ti do të jesh përjetësisht në krye të detyrës sepse sakrifikove gjënë më të çmuar, jetën, për të mirën e komunitetit dhe të Atdheut. Vlerësim dhe mirënjohje për familjen e mrekullueshme Basha, të cilës i përcjell edhe në emrin e Ministrit të Punëve të Brendshme, Saimir Tahiri, vlerësimet, përkrahjen dhe garancinë se do të jenë përherë të mbështetur, të përkrahur dhe në vëmendjen e Ministrisë së Punve të Brendshme dhe Policisë së Shtetit. Sot është dita që krahas Ibrahim Bashës, të kujtojmë dhe vlerësojmë veprën e gjithë Dëshmorëve të Policisë së Shtetit”, tha drejtori i Përgjithshëm i Policisë Haki Çako.
E motra e Ibrahim Bashës, tashmë në radhët e Policisë së Shtetit, mes lotësh theksoi se Ibrahimi ishte njeriu më i mirë që kishte njohur në jetën e saj.
“Ti vëlla, e flijove jetën tënde në emër të paqes dhe të qetësisë, në emër të atdheut. Ti besoje me gjithë forcën tënde tek ligji, tek uniforma, tek rregulli dhe u shndërove në simbol të përpjekjeve të çdo punonjësi policie, për vënien e rendit dhe respektimit të ligjit. Veprat e tua ishin të mëdha. Duke shpresuar se nje ditë do të të shohim përsëri unë jam dhe mbetem krenare për ty. Faleminderit”, tha mes emocioneve e motra.
Ibrahim Basha u vra gjatë një operacioni policor në Lazarat, mëngjesin e 24 qershorit të vitit 2015.(V.G/SHUPLAKA)
[ngg_images source=”galleries” container_ids=”380″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
