Shefi i Zyrës për Kosovën në Serbi, Marko Gjuriç, ka deklaruar se sot priste ardhjen e paparalajmëruar të ministres për Dialog në Kosovë, Edita Tahirin.
Gjuriç u shpreh se priste ta takonte atë në veri të Kosovës, duke shtuar se ajo është një qytetare e Serbisë.
“Kjo është shprehje e papërgjegjësisë personale dhe nuk ka nevojë askush të kontrabandohet. Edita Tahiri është qytetare e Serbisë. Ajo mundet, si qytetare e Serbisë, të bisedojë edhe këtu edhe në Beograd”, janë fjalët e tij.
Gjuriç deklaroi se Tahiri, si qytetare e Serbisë mund të pajiset me dokumente sikur të gjithë të tjerët, pasi ajo ka të drejtë për këtë, ndërsa ka shtuar se gjatë qëndrimit në territorin e Asociacionit shpreson që pagesa të bëhet në dinarë pasi që ajo është e vetmja mënyrë për të kryer pagesën përputhje me ligjin.
Ndër të tjera, ai shtoi se si Tahiri, si kryeministri Mustafa, po përpiqen “t’ia vjedhin famën” me mënyrën se si po lëvizin nëpër Kosovë. (D.D/Shuplaka)
