Zëvendësministrja e Mjedisit, Olijana Ifti, është shkarkuar nga detyra. Vendimi është marrrë me propozim të kryeministrit Edi Rama gjatë mbledhjes më të fundit që qeveria zhvilloi dje.
Mësohet se Olijana Ifti është komunikuar pas përfundimit të mbledhjes së Këshillit të Ministrave.
E pyetur nga një portal online lidhur me motivacionin e këtij shkarkimi të beftë, ajo është shprehur se nuk dëshiron të japë shpjegime. Por sipas këtij portal, bëhet fjalë për prishjen e marrëdhënies të PS-së me PBDNJ.
Marrëdhëniet mes kreut të PS-së Edi Rama dhe kreut të PBDNJ-së, Vangjel Dule, u tensionuan pas debatit të zhvilluar në Kuvend lidhur me prishjen e disa ndërtimeve në Himarë.
Megjithatë, firma e Dules mes shtatë firmave që kërkonin llogari për mungesën e një date konkrete për hapjen e negociatave me Bashkimin Europian, duket se është bërë edhe një shkak më i fortë që kryeministri të kërkojë prishjen e marrëdhënies me PBDNJ.
Mësohet se veç shkarkimit të Iftit, kreu i kabinetit qeverisës ka propozuar dhe shkarkimin e anëtarit të Komisionit të Prokurimeve Publike, nga radhët e PBDNJ-së, Spiro Kuro. (XH.A/SHUPLAKA)
Discussion about this post