Kreu i Lartë i Shtetit, Bujar Nishani, i ka dërguar një mesazh ngushëllimi Presidentit të Turqisë, Recep Tayyip Erdoğan, për sulmin e shënuar në Stamboll një ditë më parë.
Në mesazhin e tij, Presidenti i Shqipërisë dënon me ashpërsinë më të madhe aktin mizor që kapërcen çdo mendje e veprim njerëzor. Ai garanton mbështetje ndaj popullit turk në luftën kundër terrorizmit.
Mesazhi i ngushëllimit:
“I nderuar Zoti President,
Përgjakja e natës së ndërrimit të viteve në Stamboll nga sulmi mizor terrorist, duke i ndërprerë jetën dhe gëzimin 39 qytetarëve të pafajshëm dhe plagosur shumë tjerë, më tronditi shumë dhe më hidhëroi pa masë.
I shpreh ngushëllimet më të ndjera familjarëve të viktimave dhe të lënduarve, si dhe Qeverisë e popullit mik turk. Të lënduarve i uroj shërim sa më të shpejtë.
E dënoj me ashpërsinë dhe forcën më të madhe këtë akt mizor që kapërcen çdo mendje e veprim njerëzor dhe ju siguroj se, unë dhe shqiptarët jemi krah jush në këto momente të vështira dhe në luftën pa kompromis të terrorizmit, që synon të trembë dhe përçajë shoqëritë tona, duke mos kursyer as momentet e gëzimit dhe jetët e pafajshme njerëzore.
Bujar Nishani”
Discussion about this post