Zyrtare, Skënderbeu konfirmon shkarkimin e Agostinelit, nesër prezanton Ilir Dajën

Klubi i Skënderbeut ka zyrtarizuar ditën e sotme largimin e trajnerit Andrea Agostineli.

Korçarët përmes një postimi në profilin zyrtar në “Facebook” kanë njoftuar për largimin e teknikut italian nga ekipi. 

Prej disa ditësh pritej zyrtarizimi i largimit të Agostinelit nga kampionët në fuqi, ndërkohë që sot është bërë e ditur që drejtimin e ekipit do ta marrë ish-trajneri i Tiranës, Ilir Daja. 

Prezantimi i teknikut Daja do të bëhet ditën e nesërme në kompleksin “Tropikal” në Durrës në orën 12:00. 

Njoftimi

“Pas dy fazave të para, drejtuesit e Klub Futboll ‘Skënderbeu’ kanë arritur të zgjidhin me mirëkuptim kontratën me teknikun italian Andrea Agostinelli.

Pavarësisht besimit që trajneri kishte nga drejtuesit, rezultatet e deritanishme që skuadra ka arritur nuk shkojnë për shtat me objektivat e klubit, ndaj i urojmë suksese Agostinellit në karrierën e tij!

Skuadra do të nisë përgatitjet në Antalya në datën 6 Janar dhe në krye të pankinës është zyrtarizuar trajneri Ilir Daja, prezantimi të cilit do të bëhet në datën 4 Janar në orën 12:00 në rezidencën e kampionëve në “Tropikal Resort” në Durrës!”