Një numër i konsiderueshëm fëmijësh shqiptarë në Siri janë duke u mbajtur peng nga Shteti Islamik pasi kanë mbetur jetimë. Militantët e ISIS-it nuk i lejojnë të kthehen në shtëpi pavarësisht se prindërit e tyre kanë vdekur ose rezultojnë të zhdukur.
Referuar dokumenteve të siguruara nga “BIRN”, 13 gra dhe 31 fëmijë, përfshirë këtu 23 të mitur, u zhvendosën në Siri ku tani nuk lejohet të largohen nga aty. Familjet shqiptare u nisën drejt Sirisë në vitin 2012 dhe 2014 sipas dosjeve hetimore të Prokurorisë së Shqipërisë për Krime të Rënda.
Pas zhvendosjes në Siri, gratë dhe fëmijët jetonin në kampe, ndërsa burrat shqiptarë luftonin në vijën e frontit.
Një rast flagrant është ai i një xhihadisti të përgjuar nga SHISH dhe Prokuroria, i cili u largua drejt Sirisë fshehurazi bashkëshortes duke marrë me vete vetëm fëmijët. Ai u ndihmua nga dy policë për të lëvizur në mënyrë të jashtëligjshme jashtë vendit.
Eva dhe Endri Dumani, 9 dhe 7 vjeç, janë dy nga 31 fëmijë shqiptarë që kanë mbetur jetimë nga lufta në Siri. Babai i tyre, Shkëlzen Dumani u vra duke luftuar për ISIS-in më 5 nëntor të 2014-ës, rreth nëntë muaj pasi mori fëmijët dhe u nis për në Siri pa informuar të shoqen.
Pavarësisht përpjekjeve të familjes dhe autoriteteve shqiptare, fëmijët nuk janë lejuar të kthehen në shtëpi. (XH.A/SHUPLAKA)
Discussion about this post