Arbana Osmani, e cila do të rikthehet për të prezantuar edicionin e ri të “Big Brother” ka njoftuar se formati i këtij programi këtë vit do të jetë krejt ndryshe. Gjatë një interviste të dhënë për “Pasdite në Top Channel”, Osmani që sapo ka përfunduar sezonin e parë të “Dua të të bëj të lumtur”, ka bërë me dije disa detaje interesante nga “Big Brother 9”.
Ajo ka rrëfyer se pas emisionit me plot emocione si “Dua të të bëj të lumtur” e ka të vështirë të bëjë një program thjesht argëtues. Ndaj së bashku me autoren e “Big Brother 9” Alessia-n, është menduar që këtë vit formati të përçojë vlera si dashuria, ku njerëzit të paraqiten me dinjitet.
Ajo ka zbuluar se ndryshe nga vitet e tjera do të lejohen të marrin pjesë dhe çifte, qoftë të dashur, të fejuar apo të martuar. Por përveç kësaj risie, ajo çka përbën më tepër lajm është se do të ndalohet kategorikisht kryerja e marrëdhënieve seksuale brenda shtëpisë së “Big Brother”.
“I gjithë mekanizmi do të jetë ndryshe, pra do të jetë si një ҫorape e kthyer mbrapsht. Nëse më përpara kërshëria ka qenë “a do ketë lidhje brenda në Big Brother” dhe “a do kryhen marrëdhënie seksuale në Big Brother”, këtë vit, me sa di unë, nuk do të lejohen njerëzit që të kryejnë seks në Big Brother, është rregull i padiskutueshëm. Nëse thyhet, ata do të përjashtohen.”, është shprehur ndër të tjera Arbana Osmani. (XH.A/SHUPLAKA)
