Në reagimin e saj pas vendimit për ta lënë në paraburgim Ramush Haradinaj, Aleanca për Ardhmërinë e Kosovës e cilësoi vendimin si të pakuptimtë dhe të papranueshëm. Sipas kësaj partie, bëhet fjalë për një vendim politik dhe jo gjyqësor.
AAK e cilëson paradoks mbajtjen në burg të liderit të saj si mënyrë për t’i dhënë kohë Serbisë të plotësojë dosjet kundër tij.
“Marrja e një vendimi të tillë në bazë të një fletarresti të Serbisë, për krimet e pretenduara për të cilat zoti Haradinaj, dy herë është shpallur i pafajshëm nga Tribunali i Hagës, flet për një vendim politik e jo gjyqësor. Për më tepër mbajtja në paraburgim e zotit Haradinaj, për t’i dhënë kohë Serbisë për të plotësuar dosjet e saj kundër tij, kur Franca e ka njohur pavarësinë e Kosovës dhe kur zoti Haradinaj është shtetas i Kosovës dhe jo i Serbisë, është paradoks. U bëjmë thirrje autoriteteve të Francës dhe të Bashkimit Evropian, që të ushtrojnë gjithë trysninë e nevojshme ndaj Serbisë që të distancohet nga ish-regjimi i Millosheviçit dhe të heqë dorë nga fletarrestet e kohës së tij. Ne jemi të bindur se vendimi i sotëm për ta mbajtur në paraburgim Zotin Haradinaj do të korrigjohet shpejt dhe në mbështetje me parimet e drejtësisë ndërkombëtare, ai do të lihet i lirë të vazhdojë punën e tij”.
Discussion about this post