Faktori moshë dhe ai vjetërsi përbëjnë elementët themeltarë të formulës për përllogaritjen e pensionit të pleqërisë. Me nisjen e 2017-ës, kriteri moshë prek vetëm gratë, por ndonëse burrat nuk preken menjëherë nga zgjatja e moshës së daljes në pension, ndikohen nga rritja e viteve të vjetërsisë në punë.
Ndryshe nga viti 2016, kur gratë dilnin në pension në moshën 60 vjeç e 4 muaj, gjatë 2017-ës, ato do të dalin në pension në moshën 60 vjeç e 6 muaj. Veç moshës, grave u shtohen edhe vitet e nevojshme të punës për të përfituar pension të plotë me 4 muaj.
Duhet që burrat dhe gratë këtë vit të kenë 36 vite e 2 muaj punë për të përfituar pension të plotë.
Referuar formulës së re, “GSH” shkruan se pensioni përbëhet nga një shumë bazë, që është e barabartë me pensionin social që është 6.860 lekë shumëzim vitet e sigurimit që ka çdo person, pjesëtim vitet e vjetërsisë në punë.
Nëse kemi një person me 40 vite punë, për të përllogaritur pensionin bazë duhet të bëjmë këtë veprim: 6.860 x 40 / 36 e 2 muaj = 7.580 lekë.
Sipas këtij mekanizmi përllogaritës, baza e pensionit në 2016-ën do të ishte 7.665 lekë, rreth 85 lekë më e lartë.
Në formulën e përllogaritjes për 2017-ën, pensioni përbëhet edhe nga një shtesë, e cila është 1% shumëzim vitet e sigurimit shumëzim pagën mesatare.
“Paga mesatare përllogaritet në bazë të pagave bruto të deklaruara ndër vite, të cilat indeksohen me koeficientët përkatës, për t’i aktualizuar me tregun. Kjo bëhet duke i mbledhur pagat e deklaruara bruto (pas indeksimit) për çdo muaj dhe duke i pjesëtuar me numrin e muajve, për të cilën janë derdhur këto paga.”, citohet ndër të tjera. (XH.A/SHUPLAKA)
Discussion about this post