I ftohi që ka përfshsirë Italinë qendrore e jugore, duket se është kthyer në një emergjencë kombëtare. Deri më tani kanë vdekur 7 persona në qytetet si Milano, Firence, Latina, Altamura, Avellino, Aversa dhe Messina, shkruajnë mediat italiane.
Mes viktimave është një polak i pastrehë 66-vjeçar, i gjetur brenda një pallati të braktisur në Lombardi. Ndërkohë në Capriano, një provincë e Monzës, një pensionist 81-vjeçar është gjetur i pajetë në afërsi të lumit Bevera a Briosco, jo larg nga shtëpia e tij. Ai thuhet se ka qenë i sëmurë me Alcajmer. Adam Zbigniew Koziol, i cili kishte mbushur 49-vjeç ditën e Krishtlindjes, një tjetër i pastrehë polak është gjetur i pajetë dhe i ngrirë gjatë natës në Firence.
Po kështu në 48 orët e fundit janë regjistruar edhe 5 viktima të tjerë. Angelo Lanzaro, një 44-vjeçar baba i tre fëmijëve, ndërroi jetë nga morthi në Avellino dhe një shtetar rumun në Messina, 46-vjeç. Një sëmundje apo rënie prej akullit dyshohet të jenë shkaqe të vdekjes së një gruaje 49-vjeçare në Altamura të Bareses. Edhe një 50-vjeçar i pastrehë është ndarë nga jeta në kishën e Immacolata, në qendër të Latinës. Edhe disa aeroporte kanë mbetur të bllokuar për disa orë. Kryeministri italian Paolo Gentiloni është shfaqur sot në selinë qendrore të Mbrojtjes Civile për të mbikëqyrur operacionet e ndihmës.
Edhe të pastrehëve që nuk duan të lëvizin nga vendet ku rrinë si zakonisht u janë shpërndarë veshje të posaçme që rezistojnë deri në -20 gradë Celsius. Nga të ftohtit të acartë duket se është prekur edhe kampionati italian i futbollit, Serie A, pasi ndeshja Pescara-Fiorentina është shtyrë, teksa parashikohej të luhej sot.
I ftohti u kushtoi jetën të paktën 10 personave në shtetin Polonez. Temeperaturat zbritën nën -20 gradë Celsius të shtunën. Një burrë gjeti vdekjen në Belgjikë, pasi kamioni me të cilin po udhëtonte rrëshqiti për shkak të ngricave.
Termometri shënoi -7 gradë Celsius në qytetin e dytë më të madh të Greqisë, Selanik, ndërsa ekspertët paralajmërojnë ulje të mëtejshme. Rrugët u mbyllën përkohëshisht në disa zona në veri të Greqisë për shkak të borës dhe akullit.
Reshjet e dendura të borës përfshinë edhe Stambollin dhe kompania ajrore “Turkish Airlines” anuloi më shumë se 650 fluturime. Agjencia shtetërore e lajmeve “Anadolu” raportoi se ngushtica e Bosforit, që përshkon mes përmes Stambollin, u mbyll dhe shërbimi i trageteve u pezullua. (J.V/Shuplaka)
