Kryetari pa mandat i Bashkisë së Kavajës, Elvis Rroshi, ka ankimuar në Gjykatën Kushtetuese vendimin e Komisionit Qendror të Zgjedhjeve për heqjen e mandatit të kryebashkiakut dhe më pas shkarkimin me vendim të këshillit të Ministrave.
Mësohet se ankimimi i vendimit është kryer përmes avokatit të Rroshit, Theodhori Sallaku. Ai e ka cilësuar vendimin e KQZ-së si antikushtetues.
“Ligji i dekriminalizimit cenon lirinë dhe të drejtat e njeriut. Vendimi në kundërshtim me Konventën e të Drejtave të Njeriut. Shpresoj që Kushtetuesja të ketë kurajon për një vendimmarrje të drejtë.”
Më 29 dhjetor, ndër të tjera KQZ vendosi për heqjen e mandatit të Elvis Rroshit, vendim që mori votim unanim. Në të njëjtën ditë, kryeministri Edi Rama firmosi shkarkimin e Rroshit nga posti i kryetarit të Bashkisë së Kavajës.
Më 20 dhjetor, Prokuroria e Përgjithshme renditi Elvis Rroshin ndër rradhët e politikanëve që prekeshin nga dekriminalizimi.
“Shtetasi Elvis Rroshi, me funksion kryetar i Bashkisë Kavajë, rezulton se nuk ka deklaruar në formularin “Për Dekriminalizimin”, si vijon:
- Një dënim për veprën penale të “Përdhunimit” në grup, në vitin 1995 në Itali
- Nuk ka deklaruar përdorimin e disa emrave në Zvicër
- Në prill 1993 ka hyrë në mënyrë të paligjshme në shtetin zviceran dhe ka kërkuar azil, 14 maj 1993, është ndaluar nga policia e Zyrihut për një rast droge dhe është dëbuar 4 muaj më vonë.
- Në korrik 1997 ka hyrë përsëri në mënyrë të paligjshme dhe ka kërkuar azil. Në gusht 1997 është dëbuar sërish.
- Në vitin 2015 DEA/US , ka informuar autoritetet zvicerane se po hetonin një shtetas të quajtur Enver Rroshi për trafik droge dhe pastrim parash.”, shprehej ndër të tjera Prokuroria.
(XH.A/SHUPLAKA)
