Kryetari i Bashkisë së Tiranës, Erion Veliaj, është shprehur se plani i ri urbanistik parashikon rritjen e popullsisë deri në vitin 2030, me më shumë se 1.5 milionë banorë dhe 2 milionë pemë. I ftuar në emisionin “Njerëz në Fokus”, ai sqaroi se plani që kjo bashki trashëgoi ishte për 4.5 milionë veta deri në 2020-ën.
“I binte që të vinte e gjithë Kosova dhe shqiptarët e Maqedonisë. Është e paimagjinueshme një kataklizmo e tillë. Kur planifikon popullata, planifikon projekte ndërtimi.”, u shpreh Veliaj.
Ai tha më tej se si përgjigje ndaj delirantëve që kritikojnë çdo gjë, ati i duhet të marrë një vendim: “Moria e kërkesave, çudirave, kritikave e sharjeve, shpifjeve, është e tillë që unë duhet të marr një vendim, ose të merrem me to ose të punoj. Do ta publikoj lejen për parkingun.”
Kryetari i Bashkisë së Tiranës tregoi se prioritet i 2017-ës do të jetë fshati, pasi nëse nuk investohet në fshat, ajo popullsi do të vijë në qytet dhe asnjë nuk do të punojë tokën. “Fshati është kryefjala e 2017-ës”, theksoi Veliaj. (XH.A/SHUPLAKA)
Discussion about this post