Qytetari nga Ungri i Lezhës, Ndoc Mark Marku ka denoncuar në emsionin “STOP”, se toka dhe shtëpia e tij kanë rezultuar të bllokuara papritur në zyrat e hipotekës.
Në zyrën e regjistrimit të pasurive i thonë, se shkak është bërë një kredi e pashlyer në bankë, por vetë Ndoc Marku thotë, se kurrë nuk ka marrë kredi në asnjë bankë.
“Jam drejtuar emisionit “STOP” për arsye se më kanë bllokuar tokën dhe shtëpinë disa persona të bankës në Laprakë. Kam shkuar të bëj certifikatën e tokës dhe Hipoteka më ka nxjerrë që e kemi bllokuar tokën. Unë as nuk kam marrë kredi kurrë dhe nuk i jam drejtuar ndonjëherë asnjëlloj banke. Ndaj jam drejtuar tek ju për të ma zgjidhur këtë problem, sepse deri më sot nuk ma ka zgjidhur kush, as drejtori i Hipotekës, banka, policia apo prokuroria. Më kanë thënë merru me gjykatën.
Pas interesimit të gazetares, në bankë sqarojnë, se kredia i takon një tjetër personi me të njejtin emër. Ndaj dhe hipotekës i është dërguar një shkresë e dytë, për të hequr sekuestron.
Regjistruesi Bledar Mulajka thënë për mikrofonin e “Stop” se, do ta shqyrtojë rastin në fjalë, por kur përballet me shkresën, premton ta heqë menjëherë sekuestron ndaj pronave të personit të gabuar dhe më në fund Ndoc Mark Marku mund të pajiset me certifikatat e pronësisë. (A.R/SHUPLAKA)
Discussion about this post