Partia Demokratike ka vizituar banorët e malësive në Prrenjas, kryesisht ata të njësisë Stravaj, të cilët thuhet se kanë pësuar një goditje të rëndë nga moti i acartë i ditëve të ftohta në Shqipëri.
Sekretari i PD-së, Ervin Salianji së bashku me deputetë të kësaj partie, shfaqën mbështetjen ndaj banorëve që vijojnë të përballen me motin e acartë. Lidhur me këtë situatë, opozita akuzoi qeverinë për keqmenaxhim të situatës në fshatrat e Librazhdit, si në të gjithë Shqipërinë.
“Jemi në mbështetje të banorëve të zonave të bllokuara dhe me probleme për shkak të motit të acartë të këtyre ditëve. Ndryshe nga herët e tjera ku këto zona mbulohen edhe më shumë me borë, keqmanaxhimi i qeverisë ka bërë që fshatrat e Librazhit, ashtu si në të gjithë Shqipërinë, të jenë të bllokuara për shkak të mosshpalljes së situatës së emergjencës, apo të një emergjence artificiale të krijuar nga qeveria në ekrane në Tiranë. Këtu njëherë në katër ditë ka mjek dhe një nga banorët tha se duhet të sëmuresh me grafik në këto fshatra. Ka dështuar edhe sistemi dhe rrjeti elektrik në Shqipëri. Në fshatra elektriçistët profesionistë që kanë mbetur pa punë dhe nuk punojnë për OSHEE-në, kanë bërë të mundur lidhjen me energji elektrike. OSHEE vetëm ka rritur çmimin e energjisë, ka rritur kostot për qytetarët dhe u ka marrë me kërbaç qindarkat e fundit. Nuk ka investuar për rrjet por i ka kaluar investimet për fasada. Kjo është situata në të cilën ndodhet sot Shqipëria, një situatë e kapitullimti të shtetit dhe qeverisë, të propagandës dhe fjalëve boshe në televizione dhe të mbetjes në varfëri të madhe për qytetarët shqiptarët”, u shpreh Salianji.
Banorët u ankuan ndër të tjera për mungesën e vendeve të punës, mungesën e shërbimit mjekësor.
“Jam banor i kësaj zone dhe kam studiuar në universitet. Nuk po arrij të gjej një vend pune. Kudo që drejtohem më kërkojnë teserën e partisë, apo drejtori që të kërkon lekë”, shprehet një i ri i papunë.
“Mjeku na vjen nje herë në disa ditë. Nuk mund të sëmuresh sot, por ditën që vjen mjeku”, është shprehur një kryefamiljar, përcjell PD. (XH.A/SHUPLAKA)
Discussion about this post