Ministrja e Zhvillimit Ekonomik, Turizmit, Tregtisë dhe Sipërmarrjes znj Milva Ekonomi ka mbledhur sot anëtarët e Komitetit Këshillimor të Sektorit Privat të Turizmit, për të diskutuar disa çështje të rëndësishme që duhet të zgjidhen para fillimit të sezonit turistik 2017, si dhe për të marrë mendimin e grupeve të interesit lidhur me këto proçese në zbatim të Ligjit të Turizmit.
Në këtë takim u bë një përmbledhje e vijueshmërisë dhe rezultateve të sezonit turistik veror 2016, i cili ka qenë një vit shumë pozitiv për Shqipërinë.
Tematika e diskutimeve u vu në dy çështje kryesore:
1. Çertifikimi i rreth 70 udhërrëfyesve të pare deri në fund të muajit shkurt, në mënyrë që ata të jenë të çertifikuar për të nisur punën e tyre në sezonin e ri turistik.
2. Klasifikimi i strukturave akomoduese, i cili është një proces që do të startojë në 20 janar, përmes një platforme online të ngritur tashmë, (në e-albania) ku çdo hotel, guest house etj do të vetëdeklarojë standardet që përmbush dhe kapacitetet e tij, dhe më pas një komision i posaçëm do të verifikojë, nëse kjo strukturë i plotëson kriteret e vetëdeklaruara apo jo.
Në fund të procesit do të lëshohet një çertifikatë e klasifikimit për çdo strukturë sipas kategorive përkatëse.
Ministrja theksoi se takimi i radhës i KKSPT do të mbahet në fillim të marsit, për të parë si janë realizuar deri në shkurt këto objektiva dhe për të diskutuar çfarë do bëhet në vazhdim, në mënyrë që të jemi sa më të përgatitur për sezonin e ri turistik 2017. (A.T/SHUPLAKA)
Discussion about this post