Deklaratave të kryetarit të Komisionit për Reformën Zgjedhore Taulant Balla iu është kundërpërgjigjur bashkryetari i këtij komisioni Oerd Bylykbashi. Sipas Ballës, votimi elektronik nuk të jep plotësisht siguri nëse merren në konsideratë ndërhyrjet që kanë ndodhur në sistemet elektronike në vende të tjera të botës, megjithatë përpara diskutimit me ekspertët, nevojitet opinioni i përfaqësuesve ndërkombëtarë.
Por deputeti i opozitës Bylykbashi i cilësoi këto qëndrime si veto e Ramës kundër votimit elektronik i cili po e vret reformën zgjedhore. “Me veton e sotme Partia Socialiste praktikisht ka vrarë Reformën Zgjedhore. Votimi elektronik, indentifikimi elektronik i zgjedhësve me shenjën e gishtit dhe numërimi i votave në mënyrë elektronike është thelbi i reformës zgjedhore për zgjedhje të lira dhe të ndershme”, u shpreh deputet i Partisë Demokratike Oerd Bylykbashi pas mbledhjes së Komisionit. Votimi elektronik dhe numërimi elektronik largon partiakët dhe militantët nga procesi i numërimit dhe rezultati i zgjedhjeve del menjëherë dhe i pamanipuluar. (A.T/SHUPLAKA)
