Ministrit i Punëve të Brendshme, Saimir Tahiri ka shpërndarë ndihma në Fushë Arrës dhe Qafë Mal. Ministri Tahiri u shoqërua nga deputeti i zonës Pjerin Ndreu, nga strukturat e Emergjencave Civile dhe pushteti lokal.
“Ju e dini shumë mirë se ne me kapriçot e motit nuk kemi si t’ia bëjmë. Por ne kemi çfarë të bëjmë për t’iu gjendur në krah njerëzve, në mënyrë që të mos kenë probleme nga kushtet e vështira që na krijon kjo situatë e pazakontë. Nëse moti është vështirësi, ne këtë duhet ta përballim bashkë duke iu gjendur pranë të gjithë atyre që kanë më shumë nevojë. Kjo nuk është e lehtë. Ndaj po bëjmë gjithçka që kemi mundësi që familjet në nevojë të mos kenë probleme të rënda nga pikëpamja e ushqimeve, veshmbathjeve, kujdesit shëndetësor, komunikimit. Është përpjekja jonë, e Kryeministrit, e qeverisë, për të bërë gjithçka kemi në dorë që këto ditë të vështira të kalojnë sa më lehtë për çdo banor të Pukës, Fushë Arresit, Qafës së Malit dhe çdo zonë që ka pasur probleme me dëborën dhe motin”, tha Tahiri.
Më tej ai shtoi se në këto katër ditë janë shpërndarë gati 42 ton ndihma ushqimore për familjet në nevojë.
“Nuk është aq sa duhet, mbase nuk mjafton. Por kjo është një qeveri që nuk i ka kthyer kurrizin njerëzve dhe nuk i le ata të përballen vetë me vështirësitë e tyre.Të gjithë njerëzit janë në këmbë: e gjithë struktura shtetërore, Emergjencat Civile janë në këmbë, Policia është në gatishmëri, emergjenca shëndetësore, pushteti vendor është i gjithi në këmbë, deputeti është këtu 24 orë në 24. Ka shumë për të bërë ende. Ju na keni besuar me vote, ne jua shpërblejmë besimin tuaj me sa kemi mundësi. Mbetet ende shumë për bërë, por çdo ditë të vështirë e përballojmë bashkë. Ndaj shumë faleminderit për besimin. Shumë faleminderit që na mirëkuptoni. Ne do vazhdojmë t’ju ndihmojmë, ju dhe çdo familje që ka nevojë për ndihmë në këtë zonë. Jemi këtu me ju”, përfundoi minsitri. (J.V/Shuplaka)
Discussion about this post